اسلام آباد وزیر اعظم عمران خان نے سول ڈرون اتھارٹی کے قیام کی منظوری دے دی اور کابینہ کی منظوری کے بعد بل کو پارلیمنٹ میں پیش کرنے کی ہدایت کردی۔
تفصیلات کے مطابق وزیر اعظم عمران خان نےسول ڈرون اتھارٹی کے قیام کی منظوری دیتے ہوئے کہا ڈرون ٹیکنالوجی کمرشل،ایگرکلچر اورپرامن مقاصد میں لاناوقت کی ضرورت ہے، اتھارٹی کے قیام سےٹیکنالوجی سے متعلق قانون نہ ہونے کے خلا کو پر کیا جا سکے گا۔
وزیراعظم کا کہنا تھا لپ اتھارٹی ڈرون ٹیکنالوجی کے فروغ اور ملکی پیداوار میں بھی اہم کردار ادا کرے گی اور ڈرون سے وسائل کا موثر استعمال اورسروس ڈیلیوری میں بہتری میں مدد ملے گی۔
عمران خان نے ہدایت کی اتھارٹی کے قیام سے متعلق قانون سازی کو ترجیحی بنیادوں پر مکمل کیا جائے اور کابینہ کی منظوری کے بعد بل کو پارلیمنٹ میں پیش کیا جائے۔
اتھارٹی کا مقصد ڈرون ٹیکنالوجی کا فروغ اور اہم شعبے کو ریگولیٹ کرنا ہے ، اتھارٹی لائسنس کا اجراءدرآمداورملک میں پیداوار کی اجازت دینے کی مجاز اور ڈرونز کی پیداوار، آپریشنز، ٹریننگ اور ریسرچ اینڈ ڈویلپمنٹ کی ذمے دار ہوگی جبکہ جرمانے ،سزا، لائسنسوں کی تنسیخ اور قانونی چارہ جوئی کااختیار حاصل ہوگا۔
سیکرٹری ایوی ایشن ڈویژن اتھارٹی کے سربراہ ہوں گے جبکہ دیگر ارکان میں ائیرفورس،سی اےاے، دفاعی پیداوار ، داخلہ اور وزارتِ سائنس اینڈ ٹیکنالوجی کے اعلی ٰ حکام شامل ہوں گے۔
وفاقی اکائیوں بشمول آزاد جموں و کشمیر اور گلگت بلتستان سے ایک ایک نمائندہ شامل ہوگا جبکہ شعبے کے 3ماہرین بھی اتھارٹی کا حصہ ہوں گے۔
