لاہور: ملک کے سب سے بڑے صوبے میں انتطامی بحران جاری ہے، آج پولیس نے پنجاب اسمبلی کے مزید افسران کو گرفتار کرلیا ہے۔
ترجمان پنجاب اسمبلی کی جانب سے جاری بیان میں بتایا گیا کہ پولیس نے آج پنجاب اسمبلی کے مزید افسران کو اپنی حراست میں لے لیا ہے، ڈائریکٹر سیکیورٹی فیصل حسین کو ضمانت پر ہونے کے باوجود گرفتار کرلیاگیا ہے جبکہ سیکیورٹی اہلکار سہیل شہزاد ، لیاقت علی ،محمد طبیب اور اسامہ بھی گرفتار کئے گئے۔
پنجاب اسمبلی کے ترجمان نے بتایا کہ سیکرٹری پنجاب اسمبلی محمد خان بھٹی کی گرفتاری کےلئے پولیس کےچھاپے جاری ہے اور ان کی رہائش گاہ کے اطراف پولیس کی بھاری نفری تعینات کردی گئی ہے۔
ترجمان نے بتایا کہ اسپیکر پنجاب اسمبلی پرویزالٰہی کے پرسنل اسٹاف آفیسر کو گرفتار کرنےکےلئے بھی چھاپے مارے جارہے ہیں، گزشتہ روز بھی ریسرچ آفیسر شہباز حسین اور دو سیکیورٹی آفیسرز کو حراست میں لیا گیا تھا۔
ادھر مسلم لیگ قاف کے سربراہ چوہدری شجاعت حسین کا کہنا ہے کہ گرفتاریاں پنجاب حکومت کے حق میں بیانات کےلیے کی جا رہی ہیں، گرفتار کرکے حمزہ شہباز پرانی روایات کو اجاگر نہ کریں، گرفتار کرکے حمزہ شہباز پرانی روایات کو اجاگر نہ کریں۔
