موجودہ مہنگائی کو کنٹرول کرنے کیلئے مولانا فضل الرحمان کی حکومت کی تجاویز

اسلام آباد : پی ڈی ایم سربراہ مولانا فضل الرحمان نے مہنگائی کو کنٹرول کرنے کیلئے حکومت کی تجاویز دے دیں۔

تفصیلات کے مطابق موجودہ مہنگائی کو کنٹرول کرنے کیلئے پی ڈی ایم سربراہ مولانا فضل الرحمان کی تجاویز سامنے آگئیں۔

مولانا فضل الرحمان نے کہا ہے کہ وفاقی وزراء ،صوبائی وزراء ،مشیر ،معاونین ، آفیسرز ،گریڈ 19 سے اوپر کے بیوروکریٹس سمیت مراعات لینے والوں کے مراعات میں پچاس فیصد کمی کرنی ہوگی۔

سربراہ پی ڈی ایم کا کہنا تھا کہ قومی و صوبائی اسمبلیوں اور سینٹ کی قائمہ کمیٹیوں سمیت ہر طبقہ فکر کو قربانی دینی ہوگی ، موجودہ صوتحال گذشتہ نااہل،نالائق اور ناجائز حکومت کے غلط فیصلوں کا نتیجہ ہے

انھوں نے کہا کہ عوام اور حکومت کومل کرمہنگائی کامقابلہ کرناہوگا ، عوام پرمہنگائی کابوجھ ڈالاجاچکااب حکومت کواپنی ذمہ داری اداکرنی ہوگی، عوام کی طرح حکومتی نمائندوں ،افسروں اور اعلی عہدیداروں کو قربانی دینی ہوگی۔

مولانا فضل الرحمان کا کہنا تھا کہ حکومت کو عوام کا احساس ہے، مگر ملک کو دیوالیہ ہونے سے بچانے کیلئے سخت فیصلے کرنا مجبوری ہے۔

انھوں نے مزید کہا کہ اپوزیشن آج عوام کا سوچ رہی ہے، کاش آئی ایم ایف کے ساتھ اپنے دور میں مذاکرات کرتے وقت ان باتوں کا خیال رکھا ہوتا۔