مصروف ترین شیڈول میں خود کو فٹ رکھنے کا وقت کیسے نکالا جائے؟

آج کل کی مصروف زندگی میں ورزش اور فٹنس کے لیے وقت نکالنا بہت مشکل ہوگیا ہے تاہم ہلکی پھلکی ورزش کے ساتھ کچھ چھوٹی چھوٹی سرگرمیاں کرتے رہنا انسان کو خوش اور فٹ رکھتا ہے۔

ایک عراقی فٹنس کوچ ریچل ساسردوتی نے 6 آسان سی ٹپس بتائی ہیں جن پر عمل کر کے مصروف ترین شیڈول میں بھی خود کو فٹ رکھنا ممکن ہو سکتا ہے۔

پرعزم رہیں

خود کو صحت مند رکھنے کے سفر کا آغاز کرنے سے پہلے سب سے اہم اپنے آپ سے عزم کرنا ہے، جب آپ کسی بھی کام کا ارادہ کرتے ہیں تو اسے تکمیل تک پہنچانے کے لیے خود سے عزم کرتے ہیں۔

خود کو جوابدہ سمجھیں

اپنے کچھ قریبی افراد کو اپنے ارادوں کے بارے میں بتاتے رہنا ضروری ہے، انہیں آگاہ رکھنا اس لیے بھی ضروری ہے تاکہ وہ آپ کی ہمت بندھاتے رہیں۔

اپنی تصاویر کا ریکارڈ رکھیں

اپنے آپ میں تبدیلی دیکھنا ہی ایک حوصلہ افزا بات ہے جو آپ کو یہ ہمت دیتی ہے کہ ثابت قدمی سے اپنا عمل جاری رکھیں۔ اپنی تصاویر کے ذریعے ایک ریکارڈ مرتب کیجیے۔ جب آپ کچھ دن بعد اپنا موازنہ ان تصاویر سے کریں گے تو آپ کو فرق نظر آئے گا جس سے آپ کو ورزش جاری رکھنے کی ترغیب ملے گی۔

چھوٹے قدموں سے شروعات

جب آپ ورزش یا واک شروع کریں تو ضروری نہیں کہ آپ خود پر زیادہ سے زیادہ ورزش کرنے اور واک کا دورانیہ بڑھانے کا دباؤ ڈالیں بلکہ پہلے کم وقت اور چھوٹے قدموں سے شروع کریں۔ پہلے دن کم وقت کی واک کریں تو کوئی حرج نہیں لیکن بعد میں آہستہ آہستہ اسے بڑھاتے رہیں۔

کچھ نہ کچھ کریں

خود کو یہ یاد دہانی کرواتے رہیں کہ کچھ نہ کرنے سے کچھ کر لینا ہمیشہ بہتر ہوتا ہے اور اس طرح آپ ناکامی کے احساس اور خوف سے چھٹکارا پا سکتے ہیں۔

ورزش کا انتخاب سوچ سمجھ کر کریں

اپنے لیے کسی بھی ورزش کا انتخاب سوچ سمجھ کر کیجیے جس سے آپ لطف اندوز بھی ہو سکیں، یہ صرف مشقت نہیں ہونی چاہیئے۔