باہر علاج کرانے والوں کوکیاپتہ غریب پر کیا گزرتی ہے؟

اسلام آباد: وزیراعظم عمران خان نے عثمان بزادر کی کارکردگی کو بہترین قرار دیتے ہوئے کہا کہ وزیراعلیٰ پنجاب کے خلاف اتنی مہم چلائی گئی جو کبھی کسی کیخلاف نہیں دیکھی۔

تفصیلات کے مطابق اسلام آباد میں نیا پاکستان قومی صحت کارڈ کے اجرا کی تقریب سے خطاب کرتے ہوئے وزیراعظم نے کہا کہ مجھے برطانیہ میں صحت انشورنس سسٹم نے متاثر کیاتھا لیکن ہمارا صحت کارڈ منصوبہ امیرملکوں سے بھی آگے نکل گیا ہے، کوئی بھی خاندان نہ صرف سرکاری بلکہ نجی اسپتالوں سے بھی علاج کراسکتا ہے۔

امیر ممالک میں ہیلتھ انشورنس کےلیے پریمیم دینا پڑتا ہے لیکن ہمارے ہاں ہر خاندان کو ہیلتھ کوریج ملے گی، ہم پوری دنیا کے لیے مثال بنیں گے، کہ اصل میں فلاحی ریاست کیا ہوتی ہے۔

عمران خان کا کہنا تھا کہ عثمان بزدار کےخلاف پراپیگنڈا کیا گیا، ان کیخلاف جتنی مہم چلائی گئی میں نے کبھی نہیں دیکھی، جب سروے ہوا تو عثمان بزدار نمبر ون وزیراعلیٰ بن گئے۔

سابق حکمرانوں کو تنقید کا نشانہ بناتے ہوئے وزیراعظم کا کہنا تھا کہ پہلے کے وزیراعلیٰ ہیٹ پہن کر گھومتے تھے،کھانسی بھی آتی تھی تو علاج کے لیےبیرون ملک جاتےتھے، باہر علاج کیلئےجانےوالوں کو کیا پتہ غریب پرکیا گزرتی ہے؟ غریب علاقوں میں لوگ اسپتال کے راستے میں ہی دم توڑ جاتے ہیں

وزیراعظم نے کہا کہ پچھلے سربراہان مملکت یہ سمجھتے رہے کہ ملک میں پہلے خوشحالی آئے گی پھر ہم اسے فلاحی ریاست بنائیں گے، لیکن میں اس کے برعکس سمجھتا ہوں، ہم نے ملک کو فلاحی ریاست بنانے کی کبھی کوشش ہی نہیں کی، مدینے کی ریاست میں انسانیت اوراحساس تھا، ہیلتھ کارڈ کے بعد لوگوں کو تعلیم کے شعبے میں بھی سہولیات دیں گے، یونیورسٹیزاورکالجز میں رسول اللہ ﷺ کی سیرتِ پڑھایا جائے گا۔