کیا بھورے رنگ کا انڈا سفید انڈے سے بہتر ہے؟

کھانے کی مختلف اشیا میں بھورے اور سفید رنگ کو بڑی اہمیت دی جاتی ہے، عموماً بھورے رنگ کی اشیا کو بہتر سمجھا جاتا ہے۔

آپ جانتے ہوں گے کہ بھورے رنگ کی چینی سفید سے اچھی سمجھی جاتی ہے، اور بہت سارے لوگ صحت کے تناظر میں بھورے رنگ کی چینی کو ترجیح دیتے ہیں۔

اسی طرح بھوری روٹی سفید کے مقابلے میں صحت کے لیے زیادہ بہتر ہوتی ہے، لیکن یہ صرف رنگ کا معاملہ نہیں بلکہ اس کے اجزا کی وجہ سے اسے صحت کے لیے زیادہ بہتر سمجھا جاتا ہے۔

تو کیا بھورے رنگ کا انڈا بھی سفید رنگ کے انڈے سے بہتر ہوتا ہے؟

یہ تو آپ جانتے ہی ہوں گے کہ بھورے رنگ کے انڈے سفید انڈوں کے مقابلے میں مہنگے فروخت ہوتے ہیں، یہ بھی سمجھا جاتا ہے کہ بھورے انڈے زیادہ غذائیت والے ہوتے ہیں یا ان کا ذائقہ بہتر ہوتا ہے۔

لیکن خیال رہے کہ انڈے کے خول کا رنگ مرغیوں کی نسل کے مطابق ہوتا ہے، سرخ پروں والی مرغیاں بھورے رنگ کے انڈے دیتی ہیں، اور سفید مرغیاں سفید خول والے انڈے دیتی ہیں، لیکن کیا آپ جانتے ہیں کہ دیگر نسلوں کی مرغیاں نیلے یا سبز انڈے بھی دیتی ہیں۔

دونوں قسم کے انڈوں میں موجود غذائی عناصر کے بارے میں ماہرین کا کہنا ہے کہ ان میں کوئی زیادہ فرق نہیں ہے، ایک ماہر خوراک ڈاکٹر گارگی شرما کہتے ہیں کہ براؤن انڈے ان لوگوں کے لیے بہترین ہیں جو مناسب پروٹین حاصل کرنا چاہتے ہیں۔

قیمتوں میں فرق اس لیے ہوتا ہے کہ سرخ یا بھورے پروں والی مرغیاں سفید کے مقابلے میں زیادہ مہنگی ہوتی ہیں، اور ان کی مارکیٹ رسد بھی کم ہے، جس کی وجہ سے بھورے رنگ کے انڈے بھی مہنگے ہوتے ہیں۔