ایپل صارفین کے لیے زبردست خبر

نیویارک: موبائل فون بنانے والی مشہور کمپنی ایپل نے 217 نئے ایموجیز پیش کردیے، جنہیں دیکھ کر صارفین نے مسرت کا اظہار کیا ہے۔

ایپل کی جانب سے جاری ہونے والے اعلامیے میں بتایا گیا ہے کہ صارفین کے لیے 217 نئے ایموجیز کو سسٹم میں شامل کیا گیا ہے، جو آئی او ایس کے 14.5 ورژن میں نظر آئیں گے۔

ایپل کی جانب سے کرونا ویکسین کی آگاہی اور رغبت کے لیے ویکسین سرنج کو بھی شامل کیا گیا ہے جبکہ صنفی امتیاز کو ختم کرنے کے لیے داڑھی والی خاتون کا ایموجی بھی سسٹم میں شامل ہوگا۔

غیر ملکی خبر رساں ادارے کی رپورٹ کے مطابق اس کے علاوہ پہلے سے موجود داڑھی والے شخص کی بجائے اب داڑھی والی عورت یا داڑھی والے مرد کو منتخب کرنے کا اختیار بھی موجود ہے۔

ایپل نے آئی او ایس14.5میں سرنج ایموجی سے سرخ رنگ کو ہٹا دیا ہے جس کا مقصد کورونا ویکسینیشن کی اہمیت اجاگر کرنا اور موجودہ وبائی صورتحال کو مدنظر رکھنا ہے۔ یہ ایموجیز پرانے ڈیزائن کو مدنظر رکھتے ہوئے نئے انداز سے پیش کیے گئے ہیں۔