“ہمیں صلح صفائی اور ٹھنڈے پروگرام کی طرف جانا چاہیے”

کوئٹہ: اپوزیشن اور حکومت کے درمیان سیاسی ماحول تلخ ہونے پر وزیر داخلہ کا اہم ترین بیان سامنے آگیا ہے۔

تفصیلات کے مطابق دورہ کوئٹہ کے موقع پر میڈیا سے گفتگو کرتے ہوئے وزیر داخلہ نے کہا کہ میرا خیال ہے کہ ہمیں صلح صفائی اور ٹھنڈے پروگرام کی طرف جانا چاہیے، کیونکہ اپوزیش نے تحریک عدم اعتماد میں ہارنا ہے اور اس کے بعد بھی ہمیں تنگ کرنا ہے، تو بہتر ہے کہ ان کے ساتھ ہم ابھی سے ٹھنڈے ہوجائیں اور انہیں ذہنی طور پر تیار کردیں کہ آپ ہارنے جارہے ہیں۔

شیخ رشید نے اپوزیشن کو مخاطب کرتے ہوئے کہا کہ عمران خان پانچ سال پورے کرےگا اور تحریک عدم اعتماد میں اپوزیشن کو ناکامی ہوگی، معاملات ٹھنڈے کرلیں، الیکشن میں ایک سال رہ گیا ہے ایسانہ ہو کہ آپ لوگ مزید 10سال کیلئےلائن میں لگے رہیں۔

کوئٹہ میں میڈیا سے گفتگو میں شیخ رشید نے ایک بار پھر دعویٰ کیا کہ عدم اعتماد میں اپوزیشن کو شکست ہوگی،یہ شکست بھی تسلیم کرینگے اور اسی تنخواہ پر کام کرینگے۔

وزیر داخلہ نے کہا کہ ہم نے تحریک عدم اعتماد کےلیے قومی اسمبلی اجلاس سے سات روز قبل پارلیمنٹ لاجز کو ایف سی اور رینجرز کے سپرد کرنے کا فیصلہ کیا ہے تاکہ امن و امان کی کوئی شکایت نہ رہے، انصار السلام، بیت السلام اور پرائیویٹ ملیشیاء سمیت کسی کو اندر آنے کی اجازت نہیں دی جائے گی، حکومت 245 کے تحت فوج بلانے کا بھی اختیار رکھتی ہے لیکن اس کی ضرورت پیش نہیں آئے گی۔