کراچی: سندھ پولیس نے واٹس ایپ اور سوشل میڈیا کے ذریعے منشیات فروخت کرنے والے پانچ رکنی گروہ کو گرفتار کرلیا، گینگ میں خاتون بھی شامل ہیں۔
نمائندہ اے آر وائی نیوز کے مطابق شہر قائد میں واٹس ایپ اور سوشل میڈیا کے ذریعے خطرناک منشیات فروخت کرنے والے گروہ کو پولیس نے بے نقاب کردیا۔
ایس ایس پی کیماڑی فدا حسین نے بتایا کہ گینگ پولیس سے بچنے کے لیے واٹس ایپ اور سوشل میڈیا پر منشیات فروخت کرتا تھا، پولیس نے ملزمان کے گرد گھیرا تنگ کرنے کے بعد آج ہفتے کے روز کارروائی کی۔
انہوں نے بتایا کہ کراچی کے علاقے شیریں جناح کالونی میں کارروائی کرکے پانچ رکنی منشیات فروش گروہ کو گرفتار کیا، گینگ میں خاتون بھی شامل ہیں۔
ایس ایس پی کے مطابق گرفتار ہونے والے ملزمان کے قبضے سے بیس کلو سے زائد منشیات برآمد ہوئی ہے، گروہ کیماڑی، ڈیفنس اور کلفٹن میں منشیات فروشی کا کام کرتا تھا۔
پولیس کے مطابق گروہ میں نرگس نامی خاتون بھی شامل ہے، جو پوش علاقوں سے تعلق رکھنے والی لڑکیوں کو گھر کی دہلیز پر منشیات فراہم کرتی تھی۔ مذکورہ گروہ کے کارندے سوشل میڈیا پر آرڈر لےکر مال گھر پر پہنچانے کی سہولت دیتے تھے، ایک پیکٹ کے عوض دس ہزار روپے وصول کیے جاتے تھے۔
