ملک کے بالائی علاقوں میں پارہ نقطہ انجماد سے گر گیا

پشاور: ملک کے بالائی علاقوں میں پارہ نقطہ انجماد سے گر گیا، ملک بھر میں موسم شدید سرد ہو گیا ہے۔

تفصیلات کے مطابق ملک بھر میں شدید سردی اور بالائی علاقوں میں برف باری ہو رہی ہے، اسکردو، استور، کالام، مالم جبہ، گلگت میں پارہ نقطہ انجماد سے گر گیا۔

کوئٹہ سمیت بلوچستان ميں بھی سردی نے ڈیرے ڈال دیے ہیں، کوئٹہ سمیت بلوچستان کے بالائی اضلاع میں شدید سردی کی لہر چل رہی ہے، کوئٹہ میں کم سے کم درجہ حرارت منفی 3 ڈگری سینٹی ریکارڈ کیا گیا۔

محکمہ موسمیات کے مطابق قلات میں درجہ حرات منفی 7 جب کہ زیارت میں منفی 6 ریکارڈ کیا گیا، جب کہ صوبے کے بیش تراضلاع میں موسم خشک اور کہیں کہیں ابر آلود رہے گا۔

دوسری طرف پنجاب اور خیبر پختون خوا کے میدانی علاقوں میں دھند کا بھی راج برقرار ہے، موٹر وے کے سیکشنز آج بھی بند ہیں، کراچی میں شمال مشرق سے چلنے والی ہواؤں نے سردی میں اضافہ کیا، اور درجہ حرارت دس ڈگری ریکارڈ کیا گیا۔