جب تک ہم اپنی بچیوں کو نہیں پڑھائیں گے ملک آگے نہیں بڑھ سکتا: وزیر اعظم

اسلام آباد: وزیر اعظم عمران خان کا کہنا ہے کہ جب تک ہم اپنی بچیوں کو نہیں پڑھائیں گے یہ ملک آگے نہیں بڑھ سکتا، افسوس ہے پاکستان میں خواتین کو وراثتی حقوق نہیں ملتے۔

تفصیلات کے مطابق وزیر اعظم عمران خان نے عالمی یوم خواتین سے متعلق ایک تقریب سے خطاب کرتے ہوئے کہا کہ خواتین کو سب سے زیادہ بااختیار بنانے پر ہماری حکومت تاریخ کا حصہ ہوگی۔ ویمن رائٹس کی بات کرنا تمام طبقے کے حقوق کی بات ہے۔

وزیر اعظم کا کہنا تھا کہ ہمارے نبی نے سب سے پہلے خواتین کو وراثتی حقوق دیے تھے، افسوس ہے پاکستان میں خواتین کو وراثتی حقوق نہیں ملتے، یہ روایت ہمارے پاس ہندوستان سے آئی، ہم نے قانون تو بنا دیا اب معاشرے میں اس پر عمل درآمد کروانا ہے۔

انہوں نے کہا کہ سوچتا تھا کہ اللہ نے موقع دیا تو سب سے پہلےخواتین کو امپاور کروں گا، خواتین کے حقوق کے ساتھ تعلیم پر بھی زور دینے کی ضرورت ہے۔ اپنی کامیابی کے لیے میں اپنی والدہ کو کریڈٹ دیتا ہوں۔ جب تک ہم اپنی بچیوں کو نہیں پڑھائیں گے یہ ملک آگے نہیں بڑھ سکتا۔

وزیر اعظم نے مزید کہا کہ میں جب تک زندہ ہوں ان کو این آر او نہیں دوں گا، غریب ملکوں میں طاقتور دندناتا پھرتا ہے، جو جرم اور کرپشن کرتے ہیں ہم ان کو برا نہیں سمجھتے یہ معاشرے کی تباہی ہے۔