ڈسکہ: الیکشن کمیشن نے این اے 75 ڈسکہ کے ضمنی الیکشن کا سرکاری اعلان کردیا۔
تفصیلات کے مطابق ریٹرننگ افسر نے ضمنی الیکشن میں حصہ لینے والے امیدواروں کےسامنے سرکاری نتائج کا اعلان کیا، سرکاری نتیجے کے مطابق مسلم لیگ ن کی نوشین افتخار ایک لاکھ 10ہزار76 ووٹ لیکر کامیاب قرار پائیں۔
ریٹرننگ افسر کی جانب سے اعلان کردہ سرکاری نتیجے کے مطابق پی ٹی آئی امیدوار علی اسجدملہی نے93ہزار433 ووٹ حاصل کیے، تحریک لبیک پاکستان کے محمد خلیل سندھو 8268 ووٹ لے کر تیسرے نمبر پر رہے۔
ریٹرننگ افسر کی جانب سے جاری سرکاری نتیجے کے مطابق ضمنی الیکشن میں 212336 ووٹ کاسٹ ہوئے، جن میں سے 1702 ووٹ مسترد ہوئے، ضمنی الیکشن کے دوران ٹرن آؤٹ 43.33 فیصد رہا۔
ضمنی الیکشن کے سرکاری نتیجے کے اعلان کے بعد میڈیا سے گفتگو کرتے ہوئے نومنتخب ایم این اے نوشین افتخار نے حلقے کے عوام کو مبارک باد دیتے ہوئے کہا کہ میں عوام کی خدمت کےلیے پر عزم ہوں، اس موقع پر لیگی رہنما نے کہا کہ ملہی صاحب کو پیغام ہے کہ اقتدار کی لالچ میں لوگوں کی جانیں قربان نہیں کرنی چاہیے۔
نوشین افتخار نے کہا کہ ملہی صاحب بہت شکریہ آپ نے مجھے مبارکباد دی، میں بھی مٹھائی لےکرآپ کےگھرآؤں گی، میری یہی خواہش تھی کہ الیکشن اسی طرح پرامن ہوتا۔
دوسری جانب الیکشن کمیشن نے این اے 75 ڈسکہ میں پر امن ضمنی انتخابات پر اطمینان کا اظہار کیا ہے، الیکشن کمیشن کی جانب سے جاری اعلامیے میں آزادانہ انتخاب پر آرمی، رینجرز ،پولیس ،انتظامیہ کے کردار کو سراہا گیا۔
الیکشن کمیشن کے مطابق این اے75 میں ضمنی الیکشن شفاف ماحول میں منعقد ہوئے، ڈویژنل، ڈسٹرکٹ انتظامیہ اور پولیس کا کردار قابل تحسین رہا، کمشنر ،آرپی او گوجرانوالہ، ڈپٹی کمشنر،ڈی پی اوسیالکوٹ حلقے میں موجود رہے، رینجرز ،پاک آرمی نے بھی ضمنی انتخاب کے پرامن انعقاد میں کردار ادا کیا۔
الیکشن کمیشن کے مطابق پولنگ اسٹاف نے اپنے فرائض احسن طریقے سے نبھائے، الیکشن کمیشن عملے نے بھی مستعدی سے قومی فریضہ سر انجام دیا، پرامن ضمنی الیکشن پر الیکشن کمیشن اداروں کے ساتھ حلقے کے ووٹرز کا بھی شکرگزار ہے۔
