کراچی : تحریک انصاف کے رہنما فیصل واوڈاکی خالی نشست پر انتخاب کیلئے کاغذات نامزدگی آج سے19فروری تک جمع ہوں گے۔
تفصیلات کے مطابق تحریک انصاف کے رہنما فیصل واوڈا کی نا اہلی سے خالی ہونیوالی نشست پر انتخاب کے معاملے پر کاغذات نامزدگی حاصل اور جمع کرانے کا سلسلہ شروع ہوگیا۔
کاغذات نامزدگی جمع کرانےکی آخری تاریخ 19فروری ہے ، متحدہ قومی موومنٹ کی جانب سے سینٹ کی نشست کیلیے کاغذات حاصل کرلیے گئے ہیں۔
الیکشن کمیشن کا کہنا ہے کہ امیدواروں کی ابتدائی فہرست21فروری کوجاری کی جائےگی جبکہ کاغذات نامزدگی کی اسکروٹنی24فروری تک ہوگی۔
الیکشن کمیشن کے مطابق امیدواروں کی حتمی فہرست3 مارچ کو جاری کی جائے گی جبکہ خالی نشست پر 9مارچ کو صبح9 سے شام 4 بجے تک سندھ اسمبلی کی عمارت میں پولنگ ہوگی۔
واضح رہے کہ 9 فروری کو 2018 کے عام انتخابات کے لیے کاغذات نامزدگی کے ساتھ دہری شہریت کے معاملے پر جھوٹا حلف نامہ جمع کروانے پر الیکشن کمیشن نے حکمران جماعت پاکستان تحریک انصاف کے سینیئر رہنما فیصل واوڈا کو نااہل قرار دیا تھا۔
الیکشن کمیشن نے فیصل واوڈا کی بطور سینیٹر کامیابی کا نوٹیفیکشن بھی واپس لینے کے احکامات جاری کیے تھے۔
الیکشن کمیشن نے اپنے فیصلے میں آئین کے آرٹیکل 63 ون سی کا بھی حوالہ دیا جو کہ دہری شہریت سے متعلق ہے اور اس کے ساتھ ساتھ انہوں نے اپنے فیصلے میں آئین کے آرٹیکل 62 ون ایف کا بھی حوالہ دیا جو کہ تاحیات نااہلی سے متعلق ہے۔
