شوگر اسیکنڈل : ایک اور حکومتی شخصیت کی نیب میں طلبی

راولپنڈی: قومی احتساب بیورو ( نیب ) نے شوگر اسیکنڈل کیس میں ایک اور حکومتی شخصیت کو طلب کرلیا، صوبائی وزیرپنجاب محسن لغاری کو 4 مئی کو تمام ریکارڈ لانے کی ہدایت کی ہے۔

تفصیلات کے مطابق شوگر اسیکنڈل میں نیب راولپنڈی نےصوبائی وزیرپنجاب محسن لغاری کوطلب کر لیا ہے ، ذرائع کا کہنا ہے کہ محسن لغاری کو 4مئی کو نیب راولپنڈی کے آفس طلب کیاگیا ہے۔

ذرائع نے بتایا ہے کہ نیب کی کمبائنڈ انویسٹی گیشن ٹیم محسن لغاری سے تفتیش کرے گی، محسن لغاری کو2018تا 2019میں شوگرپر دی گئی سبسڈی کا ریکارڈ بھی لانے کی ہدایت کی گئی ہے جبکہ ایکسپورٹ کا اجازت نامہ دینے کاریکارڈ بھی طلب کیا گیا ہے۔

نیب نےگزشتہ ہفتے کین کمشنر اور چیف سیکریٹری آفس کادورہ کرکےریکارڈحاصل کیا جبکہ پنجاب میں شوگر ملز کو دی جانیوالی سبسڈی کاریکارڈ بھی مانگ لیا گیا۔

خیال رہے نیب شوگراسیکنڈل کی تحقیقات منی لانڈرنگ ایکٹ 2010کے تحت کر رہا ہے۔

یاد رہے چینی اسکینڈل میں نیب راولپنڈی نے پاکستان تحریک انصاف سے تعلق رکھنے والے صوبائی وزیرپنجاب میاں اسلم اور سابق صوبائی وزیرخوراک سمیع اللہ کو طلب کر رکھا ہے۔

ذرائع کے مطابق نیب نے میاں اسلم کو 2018تا 2019میں شوگر سبسڈی کاریکارڈ بھی لانےکی ہدایت کی گئی ہے، اس کے علاوہ ایکسپورٹ اجازت نامہ دینے کا ریکارڈ بھی طلب کیا گیا ہے۔