سانحہ سیالکوٹ میں ملوث 26 ملزمان 15 روزہ ریمانڈ پر پولیس کے حوالے

گوجرانوالہ: انسداد دہشت گردی کی عدالت نے سانحہ سیالکوٹ میں ملوث 26 ملزمان کو 15روزہ ریمانڈ پر پولیس کے حوالے کر دیا ، پیشی کے بعد سخت سیکیورٹی میں ملزمان کو واپس سیالکوٹ روانہ کردیا گیا۔

تفصیلات کے مطابق سانحہ سیالکوٹ میں ملوث 26 ملزمان کو انسداد دہشت گردی عدالت میں پیش کیا گیا ، انسداد دہشت گردی عدالت کی جج نتاشہ نسیم نے سماعت کی۔

دوران سماعت پولیس نے عدالت سےملزمان کےجسمانی ریمانڈ کی استدعا کی، جس کے بعد اے ٹی سی نے ملزمان کو 15 روزہ ریمانڈ پر پولیس کے حوالے کر دیا۔

ملزمان کی پیشی پرسیکیورٹی کے انتہائی سخت انتظامات کیے گئے اور پیشی کے بعد سخت سیکیورٹی میں ملزمان کو واپس سیالکوٹ روانہ کر دیا گیا۔

پولیس کا کہنا تھا کہ سری لنکن شہری قتل کیس میں ملزمان کے مختلف کردار سامنے آئے ، عدالت میں پیش کیے جانے والو ں میں ملزمان میں فرحان ادریس، طلحہ عرف باسط احتشام ، جنید ، صبوربٹ،راحیل عرف چھوٹا بٹ،عمران ، عثمان ،عبدالرحمان،شعیب ،شاہ زیب ،تیموراورناصر شامل ہیں۔

یاد رہے سیالکوٹ میں گزشتہ روز غیر ملکی مینجر قتل کیس میں ابتک ایک سو بیس افراد کو پولیس نے حراست میں لیا جبکہ موبائل ڈیٹا کے ذریعے ملزمان کی گرفتاری کے لئے چھاپے مارے جا رہے ہیں۔

دوسری جانب غیر ملکی مینجر پریانتھا کی پورسٹ مارٹم رپورٹ بھی موصول ہو چکی ہے، جس میں دماغ کی ہڈی ٹوٹنے کی وجہ سے موت کی وجہ بتائی گئی ہے۔

واضح رہے سیالکوٹ میں واقع وزیرآباد روڈ پر قائم لیدر فیکٹری میں گزشتہ 9 برس سے مینیجر کے عہدے پر کام کرنے والے سری لنکن شہری کو مشتعل ملازمین کے ہجوم نے بہیمانہ تشدد کا نشانہ بنا کر قتل کیا اور پھر لاش کو آگ لگا دی تھی۔