رمضان شوگر مل ریفرنس : حمزہ شہباز نے بریت کی درخواست دے دی

لاہور : حمزہ شہباز نے رمضان شوگر مل ریفرنس میں نیب کے ترمیمی آرڈنینس کو بنیاد بنا کر بریت کی درخواست دائر کردی، ان کا کہنا ہے کہ نالہ بنانے کے الزام میں ریفرنس دائر کیا گیا۔

درخواست میں حمزہ شہباز نے موقف اپنایا کہ رمضان شوگر ملز کے لیے نالہ بنانے کے الزام میں ریفرنس دائر کیا گیا،نیب ریفرنس کی کوئی بنیاد نہیں، نیب کا یہ ریفرنس بد نیتی اور سیاسی بنیادوں پر مبنی ہے۔

حمزہ شہباز نے درخواست میں کہا کہ نیب کا یہ ریفرنس موجودہ حکومت کی ایما پر بنایا گیا ہے، بنایا گیا نالہ رمضان شوگر ملز یا کسی پرائیویٹ ادارے کی ملکیت نہیں، مجھے رمضان شوگر ملز کا سی ای او ہونے کی بنیاد پر ملزم بنایا گیا ۔

ان کا درخواست میں موقف ہے کہ رمضان شوگر ملز کا اکیلا مالک نہیں، کیس سیاسی بنیادوں پر بنایا گیا ہے،جرم ثابت ہونے کا کوئی امکان نہیں، عدالت بری کرنے کا حکم دے۔

واضح رہے کہ احتساب عدالت میں نون لیگی رہنماؤں کی پیشی سے قبل عدالت کے باہر کارکنان کی بڑی تعداد موجود تھی۔