جہانگیر ترین کی حمایت کرنے والے ارکان کی فہرست تیار

لاہور: پنجاب حکومت نے جہانگیرترین کی حمایت کرنے والے ارکان کی فہرست تیار کرلی، اراکین سے متعلق حتمی فیصلہ وزیراعظم کریں گے۔

تفصیلات کے مطابق وزیر اعلی پنجاب سردار عثمان بزدار اسلام آباد پہنچ گئے ، جہاں وہ مشترکہ مفادارت کی کونسل کے اجلاس کے بعد جہانگیر ترین سے ارکان اسمبلی کے رابطے کے معاملے پر وزیر اعظم عمران خان سے ملاقات کریں گے۔

ملاقات میں صوبے کی سیاسی صورت حال اورآئندہ کی حکمت عملی پر مشاورت ہوگی اور جہانگیر ترین کے معاملے پر پالیسی طے کی جائے گی۔

ذرائع کا کہنا ہے کہ پنجاب حکومت نے جہانگیرترین کی حمایت کرنے والے ارکان کی فہرست تیارکرلی، جہانگیرترین سے رابطے میں رہنے والے ارکین سے متعلق حتمی فیصلہ وزیراعظم کریں گے۔

یاد رہے عدالت میں پیشی سے پہلے تحریک انصاف کے ارکان قومی و صوبائی اسمبلی نے جہانگیر سے ملاقات کی ، جس میں قومی و صوبائی وزراء نے جہانگیر ترین پر مکمل اعتماد کا اظہار کیا۔

ملاقات کرنے والوں میں قومی اسمبلی کے رکن راجہ ریاض ، غلام بی بی بھروانہ ، خرم لغاری ، صوبائی وزیر ملک نعمان لنگڑیال اور دیگر شریک تھے۔

اراکین کا کہنا تھا کہ جہانگیر ترین پارٹی کا اثاثہ ہیں ، جنہوں نے مشکل ترین وقت میں پارٹی کی تنظیم نو اور اس متحرک کرنے کے لیے اپنا فعال کردار ادا کیا۔